₱2.1-M nga Ore Mineral Shipment, Na-intercept sa Checkpoint sa Lanao del Norte; Tulo ka Lalaki, Nadakpan

KAPATAGAN, LANAO DEL NORTE: Nadakpan sa hiniusang pwersa sa kapolisan ug militar ang tulo ka mga lalaki human ma-intercept ang gibana-banang ₱2.1 milyon nga balor sa gidudahang ore minerals atol sa gipahigayon nga checkpoint operation sa Purok 1, Barangay Butadon, Kapatagan, Lanao del Norte niadtong Lunes sa gabi-i, Agosto 24, 2026.

Gipahigayon ang maong operasyon sa mga alas-6:10 sa gabi-i sa mga miyembro sa 2nd Provincial Mobile Force Company (PMFC) sa Lanao del Norte Police Provincial Office, uban sa pakigtambayayong sa Provincial Intelligence Unit, Regional Intelligence Division 10, ug sa 51st Mechanized Company sa 5th Battalion, Armored Division sa Philippine Army.

Giila sa kapolisan ang mga nadakpan nga sila si alyas “Ewing,” 41 anyos nga drayber; alyas “Onil,” 20 anyos; ug alyas “Ken,” nga nagserbisyo isip truckman. Ang tulo puros mga molupyo ug residente sa lalawigan sa Zamboanga Sibugay.

Nagsugod ang operasyon nang gi-flag down sa mga awtoridad ang usa ka Fuso aluminum wing van truck nga nagagikan sa Titay, Zamboanga Sibugay paingon unta sa Misamis Oriental human nabantayan nga nagagamit kini og improvised plate number. Sa gipahigayon nga beripikasyon sa mga dokumento, nadiskobrehan nga napasagdan ug expired na ang Official Receipt (OR) sa maong sakyanan, hinungdan nga gi-isyuhan kini og Motor Vehicle Impounding Receipt sa mga deputized personnel sa LTO tungod sa paglapas sa Republic Act No. 4136 o Land Transportation and Traffic Code.