BUTUAN CITY (PIA): Liboan ka mga pamilya sa Kitcharao, Agusan del Norte ang aduna na karon mas dakong higayon nga makapalit og Barato nga bugas, samtang ang mga lokal nga mag-uuma ug mangingisda nakadawat usab og hinabang sa sugnod o fuel assistance aron mapakunhod ang gasto sa produksyon, human gilusad sa Department of Agriculture (DA) Caraga ang programang Benteng Bigas Meron Na ug ang Fuel Discount Program sa maong lungsod.
Gilusad niadtong Biyernes ang programang Benteng Bigas Meron Na, diin gibana-banang 4,000 ka mga benepisyaryo ang makapalit og de-kalidad nga bugas sa kantidad nga P20 matag kilo. Ang giunang mga benepisyaryo naglangkob sa mga mag-uuma, mangingisda, kabus nga mga pamilya, solo parent, Indigenous Peoples (IPs), persons with disabilities (PWDs), ug mga senior citizen.
Ang maong inisyatiba kabahin sa direktiba ni Presidente Ferdinand R. Marcos Jr. aron mapalig-on ang food security sa nasud, mapauswag ang kahigayonan sa makuha nga barato nga pagkaon, ug madugangan ang suporta sa mga mag-uuma pinaagi sa KADIWA ng Pangulo program ug uban pang mga pamaagi nga nagpasiugda sa malungtarong kalamboan sa agrikultura ug pagtaas sa produktibidad sa umahan.
Isip dugang sa merkadong nagtanyag og barato nga bugas, namahagi usab ang DA-Caraga og mga fuel subsidy card niadtong Hulyo 29 ngadto sa 204 ka mga mag-uuma ug mangingisda sa Kitcharao ubos sa Fuel Discount Program.
Ang matag benepisyaryo nakadawat og P5,000 nga pinansyal nga tabang nga miabot sa kinatibuk-ang P1.044 milyon, nga gilauman makatabang sa pagpakunhod sa mga galastohan sa sugnod ug makapahimo sa mga benepisyaryo nga mapadayon ang ilang mga buluhaton sa pag-uma ug pagpangisda bisan pa sa pagsaka sa presyo sa lana.