DIPOLOG CITY (PIA): Gitiman-an sa Lungsod sa Sindangan ang usa ka dakong lakang padulong sa digital transformation ug financial inclusion pinaagi sa bag-o nitong gilusad nga Paleng-QR PH Program.
Gipahigayon ang maong inisyatiba pinaagi sa hiniusang pagpakigtambayayong sa Bangko Sentral ng Pilipinas (BSP), Department of Information and Communications Technology (DICT), Department of the Interior and Local Government (DILG), ug Department of Trade and Industry (DTI). Tumong sa programa nga dasigon ang mga vendor sa merkado, operators sa pampublikong sakyanan, ug mga lokal nga negosyo nga mogamit og mas luwas, paspas, ug walay-cash o digital nga sistema sa pagbayad.
Gipakita sa launching ceremony ang dugay nang paningkamot sa mga nasyonal nga ahensya sa gobyerno ug sa lokal nga kagamhanan aron paspasan ang pagpalapad sa digital financial services sa sakop sa mga barangay ug komunidad.
Lakip sa maong kalihokan ang usa ka live QR-PH payment simulation, diin gipakita ang sayon ug hapsay nga paggamit sa cashless payment sa pampublikong merkado, mga pamatigayon, ug pampublikong transportasyon.
Pinaagi sa malampusong pagpatuman niini, naglaum ang Sindangan nga makatukod og mas moderno, lig-on, ug mas labaw nga inklusibo nga komunidad pinaagi sa pagdawat sa luwas ug episyenteng mga digital payment solutions.