GENERAL SANTOS CITY (PIA): Gipalig-on sa Department of Social Welfare and Development (DSWD) Regional 12, pinaagi sa Disaster Response Management Division (DRMD) niini, ang mga paningkamot sa pagtubag sa kalamidad pinaagi sa paghatag og hinabang pinansyal ug mga kinahanglanong suporta sa mga pamilyang naapektuhan sa katarag o landslide niadtong Hulyo 10 sa lungsod sa Malapatan, Sarangani.
Pinaagi sa Crisis Intervention Unit-Assistance to Individuals in Crisis Situation (CIU-AICS), nagtunol ang DSWD og ₱10,000 nga cash assistance sa matag usa sa 10 ka pamilyang namatayan aron makatabang sa ilang dinaliang panginahanglan samtang nagsugod sila sa pagbangon gikan sa maong trahedya.
“This assistance aims to help them address their immediate needs as they begin recovering from the tragedy,” matud pa ni Cesar Ian P. Manico, ang information officer sa Disaster Response Management Division sa DSWD-12.
Sumala sa DSWD, ang maong katarag nagdala og kasubo tungod sa mga namatay, pagkaguba sa mga balay, ug pagkahaladlok sa mga pamilya, diin kadaghanan sa mga residente napugos sa pagpabilin sa mga designated evacuation center.
Nakasumpo usab ang maong panghitabo sa ilang panginabuhian ug nagdala og kaipit sa huna-huna sa mga biktima, nga nag-aghat sa ahensya sa dali nga paghatag og pagkaon, temporaryong kapasilungan, mga importanteng non-food item, psychosocial support, ug hinabang nga pinansyal.
Gawas sa paghatag og cash aid, nagpatsetup ug nagdumala usab ang DSWD Region 12 og mga evacuation center uban ang pagpakigtambayayong sa mga lokal nga kagamhanan ug mga katuwang nga ahensya.
Nang-apod-apod usab ang ahensya og ready-to-eat food (RTEF), family food packs (FFPs), non-food items, ug uban pang mga relief supply, samtang nagpahigayon og psychosocial support activities, ilabi na alang sa mga bata ug mga naapektuhang pamilya.
Padayon usab ang pag-monitor ug paghimo og rapid needs assessment aron masiguro nga ang mga angay nga tabang magpabilin nga available sa tibuok nga proseso sa ilang pagbangon.