COTABATO CITY: Walay labaw sa walo ka lingin ang itiman sa mga botante sa Bangsamoro Autonomous Region in Muslim Mindanao (BARMM) sa ilang mga balota atol sa unang Bangsamoro Parliamentary Elections karong Setyembre 14.
Saysayanon ang maong piniliay dili lang tungod kay kini ang unang eleksyon sa BARMM pito ka tuig human sa pagkatukod niini, kundi tungod sab kay sa unang higayon sa kasaysayan sa eleksyon sa Pilipinas, ang mga logo sa mga partido ug ang mga hulagway sa mga kandidato giimprenta sa balota. Ang gidak-on sa balota moabot sa 8.5 x 22.83 pulgada.
Moabot sa 80 ka Members of Parliament (MPs) ang pilion, apan ang matag botante sa BARMM mo-itip ra og walo ka lingin aron mopili og usa ka regional parliamentary political party (RPPP), usa ka district representative, ug unom ka sectoral representatives — duha para sa settler communities, ug tag-usa para sa kababayen-an, kabatan-onan, Ulama, ug traditional leaders.
Ang duha pa ka seats nga gitagana alang sa Non-Moro Indigenous Peoples (NMIPs) pilion pinaagi sa ilang mga tribal assembly sa wala pa ang eleksyon sa Setyembre 14.
Nagsugod ang 45 ka adlaw nga panahon sa kampanya niadtong Hulyo 30 diin 631 ka mga kandidato ug nominado ang nag-illog sa 80 ka pwesto.
Adunay 13 ka RPPPs nga nakatala sa mga balota diin ang ilang mga ngalan ug logo makita sa unang bahin sa opisyal nga balota. Ang ngalan sa Moro Ako Party, kansang rehistrasyon isip RPPP gikansela sa Comelec niadtong Agosto 4 tungod sa misrepresentation, nagpabilin gihapon sa balota.
Ang hapit 2.4 ka milyon nga mga botante sa BARMM mopili og 80 ka Members of Parliament — 40 kanila mga representante sa political party, 32 ka district representatives, ug walo ka sectoral representatives.
Ang pag-apod-apod sa 40 ka pwesto sa partido subay sa proportional representation system.
Aron makakuha og pwesto, ang usa ka partido kinahanglang makakuha og dili ubos sa 2.5% sa kinatibuk-ang bvalid votes nga gipagawas para sa mga RPPP, subay sa giamendahan nga Bangsamoro Electoral Code. Sa wala pa giusab ang Code, ang gipangayo nga threshold anaa sa 4%.