MALAPATAN, Sarangani: Usa ka dako nga katarag o landslide sa luyo sa usa ka eskuylahanan sa Sitio Alyeng, Barangay Sapu Masla dinhi ang nag-aghat sa mga awtoridad sa pagrekomendar sa pagbalhin sa 54 ka panimalay ug sa Alyeng Indigenous Peoples (IP) School ngadto sa mas luwas nga dapit.
Nadokumento ang maong katarag pinaagi sa drone footage atol sa post-disaster needs assessment nga gipahigayon sa mga rehiyonal nga buhatan sa Office of Civil Defense (OCD), Department of Education, Mines and Geosciences Bureau (MGB), ug sa Malapatan Municipal Engineering Office.
Gisusi sa grupo ang maong dapit aron masiguro ug makumpirma ang gitahong kadaot sa Alyeng IP School.
Giila sa MGB XII ang pipila ka mga aktibong katarag sa ubos nga bahin sa bakilid sa sidlakang bahin sa Sitio Alyeng ug sa eskuylahanan.
Ang mga katarag adunay kalabutan sa Magnitude 7.8 nga linog niadtong Hunyo ug gipasamot sa mga ulan gikan sa habagat nga gipalig-on sa Severe Tropical Storm Inday ug Typhoon Kiyapo, sumala sa maong pagtuon.
Nakita usab sa grupo ang mga lamat o tension cracks nga mitabok sa natad sa eskuylahanan, sa mga klasrum, ug sa mga silingang dapit, nga nagpakita sa posibleng paglihok sa yuta ug naghatag og hulga sa katarag sa eskuylahanan ug sa duol nga mga panimalay.