DAVAO CITY: Giawhag sa usa ka sakop sa Sangguniang Panlungsod sa Davao City ang tanang 182 ka barangay niadtong Martes, Agosto 11, 2026, nga regular nga maglimpyo ug mag-atiman sa mga kanal, drainage system, ug mga agianan sa tubig sa ilang mga dapit aron makatabang sa pagpugong sa baha ug pagpanalipod sa panglawas sa publiko.
Naghimo og resolusyon si Councilor Jessica Bonguyan, ang chairperson sa Committee on Public Works and Highways, nga naghangyo sa mga barangay sa pagpahigayon og regular ug nakatakdang clean-up drive sa mga pampublikong kanal ug mga lateral drainage system.
Gipahayag sa resolusyon sa kagawad nga ang kusog nga ulan kanunayng nagdala og pagbaha sa mga karsada ug peligro sa panglawas kon ang mga kanal sa komunidad mabara sa lapok, solid waste, ug uban pang mga babag.
“Barangays should take responsibility for smaller neighborhood drainage systems and secondary canals, including inlets along barangay roads, to support clearing operations conducted by city government departments,” gipahayag ni Bonguyan.
Ang kagamhanan sa dakbayan, pinaagi sa Ancillary Services Unit, City Engineer’s Office, ug City Environment and Natural Resources Office, padayong nagpahigayon og mga desilting ug dako nga operasyon sa paglimpyo sa mga pangunang agianan sa tubig ug karsada.
Apan gipahinumdoman ni Bonguyan nga ang pagpabilin nga limpyo sa mga drainage system usa ka hiniusang kaakuhan ug responsibilidad sa kagamhanan sa dakbayan, sa mga barangay, ug sa mga residente.