KIDAPAWAN CITY, Cotabato Province (PIA): Nakatakdang palagdon ug palig-onon sa Department of Trade and Industry (DTI) ug sa Technical Education and Skills Development Authority (TESDA) sa Rehiyon 12 ang industriya sa automotive sa Soccsksargen pinaagi sa pagpatukod og usa ka shared service facility (SSF) alang sa mga serbisyo, pagbansay, ug pagtimbang-timbang sa automotive.
Ang maong inisyatiba nagtumong sa pagpauswag sa kapabilidad ug teknikal nga katakus sa mga trabahante sa automotive sa tibuok rehiyon pinaagi sa paghatag og mga modernong pasilidad alang sa pagbansay, assessment, ug praktikal nga pagtuon.
Gihan-ay nga itukod sa Pigcawayan, Cotabato Province, ang maong SSF adunay gigahin nga pondo nga nagkantidad og ₱4.2 milyon.
Sumala sa mga talaan sa gobyerno, ang industriya sa serbisyo sa automotive padayong nagatubo, diin nakahatag kini og gibana-banang ₱71.4 bilyones sa ekonomiya sa nasud niadtong 2024 pinaagi sa pagbaligya, pag-atiman, ug pag-ayo sa mga sakyanan ug motorsiklo.
Aron opisyal nga mapatuman ang maong pakigtambayayong, ang DTI-12 Regional Director nga si Flora Politud-Gabunales ug ang TESDA-12 Acting Regional Director nga si Remegias Timonio nagpirmahay hinuon og memorandum of agreement (MOA) nga naglatid sa hiniusang paningkamot sa pagpalambo sa bokasyonal nga edukasyon ug pagbansay sa rehiyon.
Ubos sa maong kasabutan, ang DTI ang maghatag sa pasilidad ug sa mga gikinahanglang kagamitan. Ang TESDA usab ang moila sa ilang Provincial Training Center sa Pigcawayan isip nahimutangan ug maoy modumala sa operasyon sa maong pasilidad.