WASHINGTON, D.C.: Sulod sa 100,000-square-foot nga pasilidad sa National Geographic Museum of Exploration sa Washington, D.C., diin gipreserba ang mga orihinal nga sulat ug research field notes ni Jane Goodall ug ang bato gikan sa buwan nga nakolekta atol sa 1969 Apollo 12 mission, makit-an usab ang usa ka citizen science kit sa mga lokal nga nagapanalipod sa kalapukan sa Cagwait, Surigao del Sur, isip ilang pamana sa grassroots marine conservation.
Ang maong kit bahin sa koleksyon sa museyo sa gatusan ka kagamhanan sa eksplorasyon gikan sa nagkadaiyang dapit sa kalibutan, uban ang mga immersive experience, multi-media environment, artistic installation, ug mga makasaysayanong archive nga nagpakita sa gihimo sa NatGeo sa pagpreserba sa kalikopan.
Gihubit sa NatGeo ang citizen science isip usa ka pamaagi sa pag-apil ug pakigtambayayong sa publiko sa mga panukiduki sa syensya aron mapadako ang kahibalo. Pinaagi sa citizen science, ang mga tawo makig-ambit ug makatabang sa mga programa sa pagsubay ug paghipos og datos.
Ang citizen science kit sa Cagwait naglangkob og GPS unit, usa ka seagrass field guide, ug usa ka mangrove assessment data sheet. Nahimo kini pinaagi sa mga proyekto sa pagpanalipod sa kalikopan nga gipangulohan sa komunidad, diin gitigom ang mga lokal nga asosasyon sa mangingisda aron ilahon ug bantayan ang mga lasang sa bakhaw ug kasagbotan sa dagat, ubos sa pakigtambayayong sa Oceanus Conservation, usa ka NGO nga nagabase sa syensya nga nagapanalipod ug nagapahiuli sa mga blue carbon habitat sa Pilipinas.