MANILA: Gipamatud-an sa usa ka state auditor gikan sa Commission on Audit o COA atol sa impeachment trial sa Senado nga nagpagawas gyud ang ahensya og Notice of Disallowance batok sa Office of the Vice President o OVP alang sa 73 million pesos nga confidential funds niini.
Sa iyang testimonya, gipahayag ni Xylene Mae Del Campo sa COA Intelligence and Confidential Funds Audit Office nga lakip sa disallowed nga kantidad ang 69.5 million pesos para sa payment of rewards nga gisuportahan ra og acknowledgment receipts ug walay lig-on nga proba sa kalampusan. Ang natabilin nga 3.5 million pesos gigamit usab sa mga kagamitan nga wala gitugot sa Joint Circular 2015 01 pareho sa mga muwebles ug kompyuter, ug wala gani gipakiya og mga opisyal nga resibo o invoice.
Gipadayag usab ni Del Campo sa pagpangutana ni private prosecutor Lorna Kapunan nga ang mga Protective Intelligence Operations Reports gikan sa una hangtod sa ikatulo nga kwarter sa 2023 nagpakita ra nga mitambong si Vice President Sara Duterte sa mga graduation, tree planting, courtesy visits, ug coordination meetings. Matud pa sa COA, kining mga kalihokan dili subay sa balaod alang sa confidential funds ug walay bisan usa nga makahustipikar sa pagpagawas og pondo para sa rewards. Gibalibaran sa COA ang apelasyon sa OVP niadtong Abril 2026, samtang gihulat pa karon ang desisyon sa gihain nilang motion for reconsideration.