GENERAL SANTOS CITY: Ang kaluwasan sa mga kabataan ang pangunang gihunahuna sa pipila ka mga ginikanan samtang nagasugod na usab ang face-to-face nga mga klase sa dakbayan sukad niadtong Huwebes, human sa duha ka bulan nga pagkasuspenso tungod sa magnitude 7.8 nga linog niadtong Hunyo 8 nga niguba sa pipila ka mga estruktura.
Gipahayag ni Willa Bravo, kinsang duha ka anak nagatungha sa Grades 1 ug 4 sa Balunto-Labangal Elementary School, nga mas gipili niya ang face-to-face nga klase tungod kay mas maayo kini nga pamaagi sa pagtuon kumpara sa modular learning. Apan taliwala niini, anaa gihapon ang iyang kabaka kon luwas na ba gyud sa hingpit ang mga pasilidad ug tulunghaan.
“Kon ako ang papilion tali sa face-to-face o module, mas maayo gyud ang face-to-face kay mas makatuon ang bata,” gipahayag ni Bravo. “Ok ra man kay dili na man ingon ana kakusog ang mga pagtay-og kumpara sa una, apan dili sad nako masulti nga luwas na gyud kaayo karon,” iyang gidugang.
Ubos sa Executive Order No. 48 nga gipagawas sa buhatan sa mayor niadtong Agosto 12, gipahimangnoan ang tanang tunghaan nga motuman sa mga structural integrity clearances, building occupancy limits, evacuation measures, ug uban pang mga earthquake safety protocols.
Apan alang sa laing ginikanan nga si “Jay” gikan sa Notre Dame Dadiangas University, ang kaluwasan dili lang nagatutok sa kaayohan sa mga bilding.