Rep. Kaka Bag-ao, nisuportar sa bag-ong balaod alang sa income tax exemption sa mga trabahante

DINAGAT ISLANDS: Gipahayag ni Dinagat Islands Representative Kaka Bag-ao, kauban ang Akbayan Reform Bloc, ang ilang padayon nga suporta alang sa kaayohan sa mga mamumuo ug sa ilang mga pamilya pinaagi sa pagduso og mga balaodnon nga maghatag og daling kahupayan sa ekonomiya.

Usa sa mga nag-unang lakang nga gisuportahan sa mambabalaod mao ang House Bill No. 10440, diin si Rep. Bag-ao usa sa mga co-author kauban silang Akbayan Party-list Representatives Chel Diokno, Percival Cendaña, ug Dadah Kiram Ismula. Nagatuyo ang maong balaodnon nga patas-an ang threshold sa income tax exemption sa nasud aron mas madako ang take-home pay sa mga ordinaryong trabahante.

Gipasabot sa maong grupo nga ang pagpataas sa tax exemption threshold usa ka importanteng pamaagi aron tabangan ang mga pamilyang Pilipino sa pag-atubang sa nagasaka nga presyo sa mga panguna nga palagoton, kuryente, serbisyo, ug petrolyo.

Pinaagi niining maong inisyatibo sa Kongreso, gilauman nga mas madagdagan ang pondo nga magamit sa mga pamilya para sa ilang adlaw-adlaw nga panginahanglanon, samtang padayon nga gipaningkamutan ni Rep. Bag-ao ang pagdala og dugang nga kalambuan ug oportunidad sa probinsya sa Dinagat Islands.