DepEd Region 11: 1,295 ra ka security personnel ang nagbantay sa hapit 2,000 ka tunghaan alang sa 1.1M ka estudyante

DAVAO CITY: Gibutyag sa Department of Education (DepEd) Region 11 nga moabot ra sa 1,295 ka mga security personnel ang nagatabang sa pagpabilin sa seguridad sa kapin 1.1 ka milyon nga mga estudyante sa pampublikong tunghaan sa tibuok rehiyon.

Pinaagi sa usa ka press conference sa Royal Mandaya Hotel niadtong Miyerkules, Agosto 19, 2026, gipatin-aw ni DepEd 11 Spokesperson Janielito S. Atillo nga base kini sa ilang “School Safety and Security Audit Round 2 Tracker” nga natala niadtong Agosto 10. Gipagawas ang maong datos usa ka adlaw human sa nakapangurog nga pagpamusil sulod sa Ateneo de Zamboanga Junior High School campus diin duha ang nasawi, lakip na ang nagpusil sa iyang kaugalingon.

Gipasabot ni Atillo nga wala pa nalakip sa maong ihap ang mga augmentation gikan sa kapolisan. “Kung aduna kay liboan nga mga estudyante ug aduna ra kay 20 hangtod 30 ka security personnel, dako gyud kini nga problema ug hagit,” sumala pa sa sakop sa DepEd.

Tungod sa maong kakulang sa tawo ug mga kahimanan sama sa mga handheld metal detectors, gipatuman na sa DepEd ang mas hugot nga protocol diin ang tanang mosulod sa tunghaan—magtutudlo man, estudyante, o bisita—kinahanglang moagi sa inspeksyon sa bag ug mga sakyanan.

Naghangyo usab si Atillo sa mga ginikanan nga tabangan ang mga eskwelahan pinaagi sa pag-inspeksyon daan sa ilang mga anak sa wala pa sila mobiya sa balay. Sa iyang bahin, gipahinumdoman usab ni Davao City Police Office spokesperson Major Ma. Teresita Gaspan ang mga tunghaan, ilabi na ang mga pribadong eskwelahan, nga mas pahugtan pa ang inspeksyon sa mga sakyanan ug puy-anan sulod sa campus aron malikayan ang bisan unsang hulga sa kaluwasan.