MANILA: Nagsumite ang Bureau of Corrections (BuCor) og ₱11.9 bilyon nga proposed budget alang sa tuig 2027 aron matabangan ug mapasiguro ang padayong pagpaayo ug modernisasyon sa mga operasyon sa pasilidad sa priso sa nasud.
Sumala ni BuCor Director General Gregorio Pio Catapang Jr., ang maong sugyot nga pondo mas taas og 9.6 porsiyento kumpara sa kasamtangang ₱10.88 bilyon nga pondo karong tuiga. Nagatuyo kini nga pondohan ang kinahanglanong pasilidad, pagpaarang-arang sa seguridad, panginahanglanon sa mga empleyado, ug ang pagbalhin sa mga persons deprived of liberty (PDLs) sa nagkalain-laing pasilidad sa penal.
Gipatin-aw ni Catapang nga ang ₱11.9 bilyon nga proposed allocation gilangkuban sa mga mosunod:
- ₱7.6 bilyon alang sa Personnel Services
- ₱3.7 bilyon alang sa Maintenance and Other Operating Expenses (MOOE)
- ₱519.9 milyon alang sa Capital Outlay
Dugang pa sa opisina, tumong sa maong pondo nga masulbad ang problema sa overcrowding o paghuot sa mga selda, mapaayo ang rehabilitasyon ug livelihood programs alang sa mga PDL, ug mapalig-on ang sistema sa seguridad ug digital systems sa priso.
Sa kasamtangan, adunay 9,831 ka mga personahe ang BuCor gikan sa ilang 10,425 nga plantilla positions. Giangkon usab sa ahensya nga layo pa kini sa mithi nga ratio sa probisyon sa Republic Act No. 10575, sanglit sa karon, ang usa ka corrections officer nagatabang pa sa pagbantay sa 17 ka PDLs (1:17 kumpara sa sulundon nga 1:7), habang ang usa ka corrections technical officer nagahepot usab sa 120 ka PDLs (1:120 kumpara sa sulundon nga 1:24).
Leave a Reply