Pagtagbo Taliwala sa mga Samad sa Kasaysayan: Kumander Bukay ug Fr. Peter Geremia, Nag-abot Pag-usab sa Cotabato

KIDAPAWAN CITY, NORTH COTABATO: Usa ka talagsaon ug makasaysayanong higayon ang nahitabo sa Museyo Kutawato sulod sa Cotabato Provincial Capitol sa Kidapawan City niadtong Sabado, Agosto 29, 2026, tali sa kanhi lider sa armadong grupo ug sa usa ka Italianong misyonaryo atol sa kasaulogan sa Kalivungan Festival.

Nag-abot ug nagkamustahay silang Norberto “Kumander Bukay” Manero Jr., ang kanhi kontrobersyal nga pangu sa Ilaga vigilante group, ug si Fr. Peter Geremia, usa ka misyonaryo sa Pontifical Institute for Foreign Missions (PIME).

Alang sa mga nakasaksi, ang maong pagtagbo dili lang usab usa ka ordinaryong pagkita sa duha ka edaran nga lalaki, kun dili usa ka dakong simbolo sa paglaum alang sa rekonsilyasyon ug pag-ayo sa mga samad sa kagubot nga niigo sa Central Mindanao sa miaging pipila ka dekada.