DAVAO CITY (MindaNews / Agosto 5, 2026): Gipadayag sa Commission on Elections (COMELEC) nga โ95% na ang kaandamโ niini sa pagpahigayon sa labing unang Bangsamoro Parliamentary Elections karong Setyembre 14, ug ipadala ang mga balota sa ilang mga “hub” gikan sa kataposang semana sa Agosto hangtod sa unang semana sa Setyembre.
Matud ni COMELEC Chairperson George Erwin M. Garcia sa usa ka press conference niadtong Martes sa Aria Hotel and Residences dinhi, ila nang gitino daan ang mga hub diin gibutangan kini og mga pwersa sa seguridad ug mga personahe gikan sa Bangsamoro Electoral Office aron panalipdan ang mga gamit sa eleksyon.
Gidugang pa niya nga ang mga ballot box, baterya, ug uban pang mga gamit sa botasyon na-deploy na sa maong mga hub.
Gipasalig usab niya nga mahuman ang tanang “kritikal” nga mga preparasyon sa katapusan sa Agosto.
Lakip niini, matud ni Garcia, ang duha ka semana nga pagbansay para sa 20,000 hangtod 21,000 ka mga magtutudlo, prinsipal, ug ilang suportang personahe nga modumala sa eleksyon. Magsugod ang ilang pagbansay sunod semana tungod kay miabot na sa Cotabato City ang mga trainer niadtong Lunes.
Gitaho usab niya nga adunay kinatibuk-ang 3,000 ka mga pulis gikan sa Regions 9, 11, ug 12 ang sertipikahan sa Department of Science and Technology (DOST) sa paggamit sa mga vote-counting machine kung ugaling dili mahimo sa mga magtutudlo ang ilang tahas isip mga miyembro sa board of election inspectors.
Bisan pa sa kaandam sa COMELEC, gipadayag ni Garcia nga ang “kinadak-ang hagit” karon mao ang misinformation o sayop nga impormasyon.
Matud niya nga ang pagtuo sa uban nga dili madayon ang piniliay nagpakita nga adunay nag-atubang nga misinformation. “While the election is getting nearer, there will be more [misinformation],” panapos ni Garcia.