BUTUAN CITY: Giinagurahan sa lokal nga kagamhanan sa San Francisco, Agusan del Sur ang ilang bag-o ug modernong integrated bus terminal niadtong Agosto 3 didto sa Barangay Hubang.
Mainiton nga gipangandaman ug gipletehan sa mga pasahero ug lumulupyo ang maong bag-ong pasilidad tungod kay nagdala kini og kasayon ug kaharuhay sa mga biyahedor.
Ang bag-ong integrated bus terminal sa San Francisco, nga gidisenyo nga sama sa layout sa airport, adunay kumpletong mga pasilidad sama sa limpyo nga comfort rooms, lactation areas, food stalls, ug gitudlo nga bay areas para sa nagkalain-laing ruta. Ang mga pampasaherong van aduna usab ilang kaugalingong parkinganan ug loading zone, aron masiguro ang hapsay nga pagbiyahe sa mga komyuter ug turista.
Ang San Francisco, nga dugay nang giila isip gateway town para sa mga biyahedor nga moagi tali sa rehiyon sa Davao ug Butuan City, aduna na karon terminal nga nagpakita sa modernong sukaranan sa imprastruktura sa pampublikong transportasyon.
Gikalipay pag-ayo sa mga lokal ug bisitang pasahero ang maong kalamboan. Si Lory Kilap Kilap, usa ka biyahedor gikan sa Davao City, natingala ug namahayag sa iyang kalipay sa bag-ong pasilidad: “When I arrived here at the new San Francisco Integrated Bus Terminal, I was amazed at its interior as well as the facilities inside. Compared to the old one, this provides wider spaces for travelers like me.”