MANILA: Gipadayag sa usa ka state auditor gikan sa Commission on Audit o COA atol sa impeachment trial sa Senado nga ang mga acknowledgment receipts sa paggamit sa confidential funds sa Department of Education o DepEd ubos sa pamunoan ni kanhi DepEd Secretary ug Vice President Sara Duterte nagpakita og pagpundak ug pagpagawas sa pondo sa nagkadaiyang dapit sa nasud sa usa ra ka adlaw.
Sa pagpangutana ni private prosecutor Lorna Kapunan, gipamatud-an ni Xylene Mae del Campo sa COA Intelligence and Confidential Funds Audit Office nga ang mga resibo nga tanan may petsa nga Pebrero 21, 2023, adunay nakatala nga mga adres sa Danao, Malolos, Davao City, Negros Occidental, Agusan del Sur, Makati, ug Negros Oriental. Nagpakita usab og lain pang mga grupo sa resibo nga gipagawas niadtong Pebrero 25, 2023, ug Agosto 9, 2023, diin ang uban niini walay nakatala nga mga ngalan sa nakadawat.
Gipatin-aw ni Presiding Officer ug Senator Francis Escudero nga kon ang DepEd Special Disbursing Officer nga si Edward Fajarda ra ang bugtong awtorisado nga mopagawas sa maong pondo, imposable nga mabisita ug maadtuan niya ang tanang layo nga mga dapit sa nasud sa sulod lamang sa usa ka adlaw. Gipahayag usab ni Del Campo nga ubos sa Joint Circular 2015 01, ang gitudlo nga disbursing officer lamang ang adunay katungod sa pag-apod-apod sa confidential funds ug dili kini mahimong ipasa o ibalhin ngadto sa ubang tawo.