DAVAO CITY: Opisyal nga gipahibalo ug gisaulog ang Agosto 14 isip usa ka special non-working holiday sa tibuok dakbayan sa Davao City.
Kining maong saulog ug peryado gigahin aron mahatagan og igong higayon ang mga Davaoeño ug mga bisita sa pagtambong, pagpakig-uban, ug pagpasiugda sa tinuig nga pagsaulog sa Kadayawan Festival ug sa Indigenous Peoples (IP) Day.
Ang Kadayawan maoy tinuig nga saulog sa pagpasalamat sa Davao City alang sa usa ka madasigong abot ug ani. Nagatutok kini sa paghatag og dungog sa 11 ka lumad ug Muslim nga ethnolinguistic nga komunidad sa rehiyon: ang Ata, Bagobo-Tagabawa, Klata, Obu-Manuvu, Matigsalug, Iranun, Kagan, Maranao, Maguindanaon, Sama, ug Tausug. Ang pulong nga “kadayawan” gikan sa termino sa Obu-Manuvu nga nagakahulogang tanang butang nga maayo, tinuod, ug bililhon sa kinabuhi.
Nagsugod ang pormal nga saulog pinaagi sa Misa Pasasalamat sa San Pedro Cathedral, diin nagahiusa ang tradisyonal nga pagpasalamat sa mga lumad ug ang katolikong pagtuo sa dakbayan. Gikan niini, ang matag tribo nagapadayag sa ilang kultura pinaagi sa kompetisyon sa street dancing, floral floats, pagtukatuk sa tradisyonal nga mga instrumento, ug ang pagpili sa Hiyas sa Kadayawan pageant. Dili lang kini usa ka ordinaryong parada sa abot, kay ang matag grupo nagasaysay sa ilang tinuod nga istorya sa tribo pinaagi sa matag detalye sa ilang attire, pagsayaw, ug mga ritwal.