GENERAL SANTOS CITY: Nagsugyot ang Bureau of Fisheries and Aquatic Resources (BFAR) nga ilisan ang kasamtangang paper-based catch certification system sa nasud pinaagi sa usa ka electronic platform aron mapalambo ang pag-susi ug pag-trace sa ginikanan sa mga isda ug mga produktong gikan sa kadagatan nga ginabaligya gawas sa nasud.
Gipresentar sa BFAR ang maong gisugyot nga amiyenda sa Fisheries Administrative Order (FAO) No. 268, Series of 2023, atol sa usa ka public consultation niadtong Agosto 13 sa General Santos City. Gitambongan kini sa mga commercial fishing vessel operators, exporters, processors, canneries, suppliers, ug uban pang mga stakeholders sa industriya sa pangingisda.
Ang maong giduso nga pagbag-o nagatuyo sa pagpatuman og electronic catch certification process aron matubag ang mga gipangayo nga rekisitos sa mga dagkong merkado sa gawas sa nasud, lakip na ang European Union ug Japan.
Tuyo usab sa maong lakang nga palig-onon ang kakayahan sa panggamhanan sa pagsumpo sa Illegal, Unreported, and Unregulated (IUU) fishing pinaagi sa mas maayong pagsubay sa supply chain gikan sa gigikanan sa isda.
Sumala kay BFAR-12 OIC Regional Director Eugene M. Casas, makatabang ang amiyenda aron masiguro nga ang mga produktong gikan sa pangingisda sa Pilipinas magpabilin nga nakasubay sa mga internasyonal nga sukdanan.
Gihisgotan usab sa maong konsultasyon ang posibleng gasto alang sa mga negosyo ug mga buhatan sa panggamhanan ubos sa gilauman nga pagbalhin sa digital certification. Gipresentar ni Peter Erick Cadapan, sakop sa BFAR Regulatory Impact Assessment (RIA) Committee, ang RIA nga gikinahanglan ubos sa Republic Act No. 11032 o ang Ease of Doing Business and Efficient Government Service Delivery Act, aron masukod ang epekto niini sa administrasyon ug pondo sa mga lungsanon ug panggamhanan.