CAGAYAN DE ORO CITY: Dako ang pag-awhag ni Cagayan de Oro City Councilor Enrico Salcedo, ang chairman sa committee on public utilities, sa mga kasamtangang taxi operator ug kooperatiba sa siyudad nga dawaton ang pagsulod sa mga electric unit.
Kini subay sa dili na mapugngan nga pagsulod sa Green GSM sa Region 10, diin adunay 200 ka mga yunit nga nakaparking na sa ilang lapad nga depot sa Barangay Taytay, Lungsod sa El Salvador.
Nasayran nga daghang mga taxi driver sa Cagayan de Oro City ang nabaka sa pagsulod sa Green GSM sa dapit, sa pagtuo nga makapakunhod kini sa ilang panginabuhian.
Kini ang nag-aghat kang Land Transportation Franchising and Regulatory Board (LTFRB) Region 10 Director Alexes Joseph Bendijo sa pagpahayag sa miaging katapusan sa semana nga ang maong mga yunit ipakatap sa ubang dapit sa rehiyon.
Apan gipahayag ni Salcedo nga tungod sa pagiging environment-friendly niini, ang mga electric vehicle mao na ang kaugmaon sa transportasyon sa yuta, ug kinahanglang tagdon sa mga lokal nga grupo sa transportasyon ang maong katungdanan ug kabag-ohan sa ilang adlaw-adlaw nga operasyon.