TAGUM CITY, Davao del Norte: Gibana-banang 100,000 ka mga indibidwal ang nakadawat og tabang nga bugas atol sa paglusad sa “Bigay Bigas Para sa Masa” nga gipahigayon sa Tagum City, Davao del Norte.
Naimbitar ug naisakatuparan ang maong programa pinaagi sa ₱77-milyon nga Local Government Support Fund (LGSF) nga nadawat sa probinsya sa Davao del Norte.
Atol sa maong paglusad, tagsa ka 10 ka kilo nga bugas ang giapod-apod sa matag usa sa 101,315 ka mga benepisyaryo.
Gipasalamatan ni Davao del Norte Vice-Governor Clarice Jubahib si Presidente Ferdinand R. Marcos Jr. ug ang ubang mga katuwang nga ahensya sa gobyerno alang sa maong programa sa pag-apod-apod og bugas, diin iyang gipahayag nga dako kini og maitabang sa mga lungsanon nga nag-atubang og kalisod.
“Kay sa panahon karon nga daghan ang nag-atubang og kalisod, ang matag sako sa bugas nga atong mahatag dili lang tabang sa panimalay, kundli usa usab ka ilhanan nga adunay gobyerno nga nagpakabana ug nagpadayon sa pag-alagad,” gipahayag sa Bise Gobernador.
Magsunod pa ang dugang nga mga kalihokan sa pag-apod-apod og bugas alang sa probinsya sa ikaduha ug ikatulo nga bahin sa programa, human gipasa ug giaprubahan sa Presidente ang dugang nga ₱40 milyon alang sa LGSF sa maong lalawigan.