MALAPATAN, SARANGANI: Girekomendar sa mga awtoridad ang daling pagbalhin ug relocation sa 54 ka panimalay ug sa Alyeng Indigenous Peoples School human nag-atubang og hulga sa dako nga landslide ang Sitio Alyeng sa Barangay Sapu Masla.
Nadiskobrehan ug na-dokumento ang maong kadaot pinaagi sa drone footage sa gipahigayon nga post-disaster needs assessment sa Office of Civil Defense, Department of Education, Mines and Geosciences Bureau o MGB, ug Malapatan Municipal Engineering Office. Sumala sa MGB XII, ang mga aktibong pagdahili sa yuta nahitabo tungod sa epekto sa Magnitude 7.8 nga linog niadtong Hunyo ug gipasamot sa mga kusog nga ulan nga gidalit sa habagat ug sa mga bagyong Inday ug Kiyapo.
Nakit-an usab sa inspection team ang mga dako nga lamat o tension cracks sa yuta nga miagi mismo sa hawanan ug mga lawak-tunghaan sa Alyeng IP School. Tungod sa peligro sa padayong paglihok sa yuta, gipaspasan sa mga awtoridad ang panawagan nga ibalhin sa mas luwas nga dapit ang tibuok komunidad ug ang maong tunghaan alang sa siguridad sa mga estudyante ug residente.