GENERAL SANTOS CITY: Usa ka magnitude 6.4 nga tectonic nga linog ang miigo sa baybayon sa habagatan-kasadpan sa Balut Island sa Lungsod sa Sarangani, Davao Occidental sa alas 12:14 sa udto niadtong Miyerkules, sumala sa Philippine Institute of Volcanology and Seismology (PHIVOLCS).
Matud sa PHIVOLCS, sa ilang earthquake information No. 2, nga ang sentro o epicenter sa linog nahimutang sa 37 kilometros habagatan-kasadpan sa Balut Island sa giladmon nga 13 kilometros. Apan sa ilang unang pahibalo, giingon niini nga magnitude 7.0 ang maong linog.
Ang kinakusgang pagtay-og, nga anaa sa Intensity V, ang naitala sa lungsod sa Glan, Probinsya sa Sarangani.
Gibati ang Intensity IV sa General Santos City; sa mga lungsod sa Sarangani nga naglangkob sa Kiamba, Malungon, ug Alabel; ug sa mga lungsod sa South Cotabato nga Tupi ug Polomolok.
Reported usab ang Intensity III sa Maasim, Maitum, ug Malapatan sa Sarangani, lakip na sa Lake Sebu ug Tampakan sa South Cotabato.
Samtang, naitala ang Intensity II sa Koronadal City ug sa mga lungsod sa Banga ug Surallah sa South Cotabato.
Sa usa ka lahi nga tsunami information bulletin, gipahayag sa PHIVOLCS nga walay makaguba nga hulga sa tsunami base sa mga nakolektang datos. Matud sa ahensya nga ang linog walay gidala nga hulga sa tsunami sa Pilipinas ug wala kini nagkinahanglan og bisan unsang aksyon.
Human sa linog, nagpagawas ang lokal nga kagamhanan sa General Santos City og Executive Order No. 47 nga nag-suspinde sa mga klase sa tanang lebel sa publiko ug pribadong mga eskuylahanan, apil na ang trabaho sa mga opisina sa gobyerno ug pribado niadtong Miyerkules. Giawhag usab sa lokal nga kagamhanan ang mga residente nga magpabiling mabinantayon, mag-monitor sa mga opisyal nga pahibalo, ug unahon ang ilang kaluwasan.