CAGAYAN DE ORO CITY: Gipadayag sa mga gagmay nga mamumuhunan ug micro, small, and medium enterprises o MSMEs gikan sa nagkadaiyang dapit sa Mindanao ang ilang hangyo alang sa mas gipalapdan nga suporta sa merkado ug promosyon sa ilang mga lokal nga produkto.
Sa gipahigayon nga 35th Mindanao Business Conference sa Limketkai Mall niadtong Martes, Agosto 11, 2026, gibutyag sa mga partisipante nga dili lamang ang paghimo sa produkto ang pangunang hagit sa ilang negosyo, kon dili ang pagkab-ot usab sa mas dako nga grupo sa mga pumapalit ug ang pagbaton og modernong ekipo aron mapadako ang ilang produksyon. Gipahayag ni Geri Evangelista, ang tag-iya sa BioSkin Philippines, nga lisod ug mahal alang sa mga gagmay nga lokal nga negosyo ang pakigsanggaka sa mga dagkong brand sa modernong merkado kon walay igong ayuda sa promosyon ug paghatag og mga plataporma diin mailhan ang ilang mga produkto.
Tungod niini, nanawagan ang maong grupo ngadto sa mga policy makers ug sa panggamhanan nga maghimo og mas daghang programa nga maghatag og exposure, dugang pondo, ug mas lig-on nga suporta sa negosyo aron mas matabangan ang mga lokal nga mag-uuma ug mamumuhunan sa tibuok Mindanao.