MANILA: Giangkon sa kanhi special disbursing officer sa Office of the Vice President (OVP) niadtong Lunes nga iyang gipasa ang ₱125 milyon nga cash ngadto kang Col. Raymund Lachica, ang kanhi ulo sa Vice Presidential Security Group, aron gamiton sa mga confidential operations.
Atol sa iyang pag-atubang isip hostile witness sa ika-16 nga adlaw sa impeachment trial, gipadayag ni Gina Acosta nga si Bise Presidente Sara Duterte ang mismo nga nagmando kaniya nga ihatag ang maong pondo kang Lachica, kinsa gitudlo sa Bise Presidente isip security officer.
“Ang nag-utos po sa akin na i-release ang pera na 125 M sa security officer na si Colonel Lachica ay si Ma’am Sara Duterte,” sumala pa ni Acosta sa pangutana sa private prosecutor nga si Amando Ligutan.
Sa dihang gipangutana ni presiding officer Francis Escudero kon trabaho ba sa usa ka security officer ang paggasto sa confidential funds subay sa Joint Circular 2015-01, nitubag si Acosta og “dili”. Giangkon usab niya nga walay probisyon sa maong circular nga nagatugot sa usa ka security officer sa pag-disburse o paggasto sa maong pondo, diin ang pangunang gimbuhaton ra sa security officer mao ang paggunit sa mga intelligence report ug pag-andam sa mga accomplishment report.
Gipatin-aw ni Acosta nga trabaho gyud sa disbursing officer ang paggasto, apan human niya mabuhian ang pondo ngadto kang Lachica, naghatag kini kaniya og utilization report isip ebidensya nga na-implementar na ang mga confidential activities sa ground tungod kay kini man ang eksperto sa maong natad.