SOUTH KOREA: Nag-atubang ang South Korea og dakong hulga sa kakulang sa mga caregiver samtang paspas nga nagatigulang ang ilang populasyon. Matud sa datos sa gobyerno, gilauman nga mokabat sa 116,000 ang kakulang sa mga kawani sa eldercare sa tuig 2028, ug posibleng mosaka pa kini ngadto sa 990,000 ka dugang nga mga nag-atiman sa tuig 2043.
Bisan pa sa gilauman nga kakulang, hapit 2.3 milyon nga mga indibidwal ang nakakuha na og opisyal nga sertipikasyon ug kwalipikasyon isip caregiver, apan wala nagatrabaho sa maong natad.
Tungod niini, nagasusi ang mga eksperto ug mga pundok sa pamuo kon ang problema naggikan ba gyud sa kakulang sa tawo, o sa kawala sa tsada ug maayong suhol ug kondisyon sa trabaho sa maong sektor. Aron matubag ang maong krisis, gipahibalo sa Ministry of Justice ug Ministry of Health ang pagpili sa 24 ka unibersidad nga gitugotan nga mopahigayon og espesyal nga degree program alang sa mga langyaw nga estudyante sugod sa tuig 2026.
Kining maong duha ka tuig nga pilot program nagahatag og mga insentibo sa visa, gipagaan nga financial requirements, ug gipahiangay nga pagtudlo sa pinulongang Koreano aron mas dali silang makatrabaho ug makapuyo sa nasud human sa ilang paggradwar. Gisugdan usab sa gobyerno ang pag-abli sa mga agianan sa visa aron ang mga graduwado nga nakakuha og sertipikasyon dali nga makabalhin ngadto sa mga propesyonal nga visa status sama sa E-7.