MANILA: Mibarog sa iyang testimonya ang usa ka state auditor gikan sa Commission on Audit o COA atol sa impeachment trial sa Senado nga kulang ug dili bastante ang gi-sumite nga mga report sa Office of the Vice President ug Department of Education aron hustipikahon ang gipagawas nga pondo alang sa rewards payments.
Sa gipahigayon nga cross examination ni defense counsel Kristine Ferrer, gibutyag ni Xylene Mae del Campo sa COA Intelligence and Confidential Funds Audit Office nga walay igong ebidensya nga nagpakita sa katumanan o tagumpay sa information gathering activities sa mga kapisanan ubos ni Vice President Sara Duterte. Matud pa ni Del Campo sa pagpangutana ni private prosecutor Lorna Kapunan, ang gipagawas nga mga accomplishment report nagpakita lamang sa pagtambong sa mga graduation, tree planting, courtesy visits, ug mga meeting, nga klarong supak sa Joint Circular 2015 01 alang sa paggamit sa confidential funds.
Tungod sa maong kakulang sa lig-on nga dokumento, nagpagawas ang COA og Notice of Disallowance nga nagkantidad og 73 million pesos. Naglakip kini sa 69.5 million pesos para sa rewards payments nga gigamitan ra og acknowledgment receipts, sanan 3.5 million pesos para sa mga kagamitan nga wala gitugot sa balaod pareho sa mga muwebles ug kompyuter. Gipatin-aw usab ni Del Campo sa pagpangutana ni Presiding Officer ug Senator Francis Escudero nga ang reward payments lamang ang nagkinahanglan og proba sa kalampusan sa operasyon.