MAYNILA: Nagpadala og notice of disallowance ang Commission on Audit (COA) ngadto sa Office of the Vice President (OVP) alang sa ₱73 milyones nga confidential funds niini, sumala sa gikumpirma sa usa ka saksi gikan sa maong ahensya niadtong Martes.
Si Xylene Mae Del Campo, state auditor sa Intelligence and Confidential Funds Audit Office (COA-ICFAO), nagtestigo atubangan sa Senate impeachment court nga ang disallowed nga kantidad naglakip sa ₱69.5 milyones alang sa pagbayad og mga ganti diin acknowledgment receipts ra ang gisumite sa OVP.
Ang nahabilin nga ₱3.5 milyones naglakip sa mga gamit nga wala nakalista ubos sa Joint Circular 2015-01, sama sa mga muwebles ug kompyuter, sumala ni Del Campo.
Iyang gipahayag nga ang maong mga pagpalit walay gihuptang mga sales invoice o official receipt nga gikinahanglan gayud sa balaod.
Nigama og apela ang OVP bahin sa maong disallowance, apan gipadayag sa COA ang ilang pag-affirm niini niadtong Abril. Naghain og motion for reconsideration ang OVP niadtong Mayo, ug kini nagpabilin nga nagpaabot sa desisyon.
Atol sa pagpanukiduki ni private prosecutor Lorna Kapunan, nagtestigo si Del Campo nga base sa Protective Intelligence Operations Reports, ang mga kalihokan ni Bise Presidente Sara Duterte gikan sa una hangtod sa ikatulo nga kwarter sa 2023 pulos pagtambong sa mga commencement exercise, tree planting, courtesy visit, ug mga coordination meeting.
Gipahayag niya nga ang maong mga katuyoan dili subay sa joint circular, ug walay makit-an sa mga accomplishment report nga maghatag og katungod sa pagbayad og mga ganti.
“Itong tree-planting… Napakadaming Christmas party, napakadaming awards ceremony. Yan ba pinapayagan sa confidential funds?” ang pangutana ni Kapunan.
“Hindi po,” ang tubag sa saksi.