Angara: Online ‘groomer’ posibleng mao ang nagpukaw sa nahitabong pagpamusil sa Ateneo de Zamboanga

ZAMBOANGA CITY: Gipahayag ni Education Secretary Juan Edgardo “Sonny” Angara nga wala ginatanggong sa mga awtoridad ang posibilidad nga ang minor de edad nga gitudlo sa kapulisan nga nagpusil sa Ateneo de Zamboanga University (AdZU) naimpluwensyahan ug gitukmod sa usa ka online “groomer”.

Gipatin-aw ni Angara nga samtang ginasusi pa sa mga imbestigador ang motibo sa maong pagpamusil, aduna na’y nakit-an nga mga online violent groups nga nagapangita, nagapanool, ug nakig-istorya sa mga bata sa Internet. Ang maong mga network, sama sa “764”, nagapauswag sa tinatawag nga Nihilistic Violent Extremism (NVE) diin ginaaghat ug ginadayeg ang hilabihang pagpanakit ug kagubot nga walay klarong rason.

Sumala sa Global Network on Extremism and Technology (GNET), kining maong mga grupo naggamit og social media, online games, ug mga encrypted messaging apps aron pag-manipula sa mga kabataan. Nagapanghatag ug nagapugos sila sa mga batan-on nga mohimo og mga dautang buhat sama sa pagpanakit sa kaugalingon, pagpanunglo sa mananap, ug bisan ang pagpatay o paghimo og terorismo.

Tungod niini, naghatag og tambag ug pasidaan si Secretary Angara sa mga ginikanan nga Bantayan gayud kon kinsa ang makig-istorya sa ilang mga anak online. “Kung hindi natin papayagan ‘yan sa parke o kaya sa sari-sari store na ‘yon ang kakausapin ng mga anak natin, ‘wag natin payagan na ‘yon ang kakausapin ng mga anak natin online,” sumala pa sa kalihim.