Mga confidential funds sa OVP, gipagawas nga gigamit para sa personal nga katuyoan, sumala sa state auditor

MANILA, Pilipinas: Adunay prima facie evidence o unang ebidensya nga nagpakita nga gigamit ni Bise Presidente Sara Duterte sa personal nga katuyoan ang iyang mga confidential funds human nahimong pakyas ang iyang buhatan sa saktong pag-liquidate niini, sumala sa pagpamatuod sa state auditor nga si Roderick Wamil atubangan sa korte sa impeachment sa Senado niadtong Miyerkules.

Matud ni Wamil nga ang maong ligal nga pagtuo nakabase sa Item 8.3 sa Joint Circular 2015-01 (Guidelines on the Entitlement, Release, Use, Reporting and Audit of Confidential and/or Intelligence Funds).

Gipahayag sa Item 8.3 nga ang “Failure of the AO to liquidate any public funds for which he is accountable, upon demand by any duly authorized officer, shall be prima facie evidence that he has put such missing funds or property to personal use and benefit,” diin ang AO nagpasabot sa Accountable Officer.

Ang maong probisyon nakabase usab sa kasong Antonio C. Martinez vs. People of the Philippines and the Sandiganbayan (G.R. No. 123413, 20 Agosto 1999).

Sa balaod, ang prima facie evidence, sa dihang napamatud-an na, maoy magbalhin sa responsibilidad sa ebidensya gikan sa nagpasaka sa reklamo ngadto sa iyang kaatbang aron kini hagiton o pamatud-ang sayop. Apan ang bug-at nga responsibilidad sa pagpamatuod o burden of proof wala mobalhin, sumala sa desisyon sa Korte Suprema sa kasong Jison v. Court of Appeals (G.R. No. 124853, 1998).

Gipahayag ni Wamil ang iyang testimonya mahitungod sa prima facie evidence human gipangutana ni Senador-hukom Imee Marcos kung adunay mga nakit-an nga ang mga confidential funds gigamit ba sa personal nga katuyoan, diin gipunting ni Marcos nga ang mga nahgiban sa pag-audit wala gigamit ang pulong nga “gikawat” o giakusahan ang OVP nga naghimo og peke nga mga acknowledgment receipts.

Mitubag si Wamil nga usa kini ka pagtuo o presumption ubos sa sirkular nga dili na kinahanglan pang hisgutan.

Mahitungod sa isyu sa mga acknowledgment receipts, gipahayag sa state auditor nga walay nakit-an nga opisyal nga kaplag o pagtul-id niini tungod kay dili kini ang nag-unang gihimong pokus sa ilang audit.