Mga Umaabot nga Doktor, Gidasig nga Magsilbi sa mga Hilit ug Lagyo nga Dapit sa Mindanao 

DAVAO CITY: Gidasig ni kanhi Department of Health (DOH) Secretary Dr. Jaime Galvez Tan ang unang batch sa mga estudyante sa medisina sa University of the Philippines Mindanao (UPMin) School of Medicine (SOMED) nga magsilbi sa mga hilit ug lagyo nga dapit sa Mindanao pagkahuman sa ilang pagtungha.

Atol sa opisyal nga paglunsad sa maong bag-ong medikal nga programa, gihangyo ni Tan ang 40 ka mga freshman medical students nga boluntaryong “i-self assign” ang ilang kaugalingon sa mga dapit nga lisod maabot sa serbisyong panglawas aron matubag ang kakulang sa mga doktor sa isla.

Gipadayag usab ni Tan ang iyang pangarap nga makakita og mga doktor nga gikan mismo sa nagkalain-laing tribong Lumad—sama sa Blaan, Mansaka, Higaonon, Ata-Manobo, Yakan, ug Teduray—nga magsilbi sa ilang kaugalingong komunidad.