Rider Arestado, 16-Anyos nga Abay Nasalbar Human Nasakmitan og ₱1.3 Milyong Balor sa Shabu sa Checkpoint sa Davao de Oro

MAWAB, DAVAO DE ORO: Arestado ang usa ka 23-anyos nga drayber sa motorsiklo samtang gipailalom sa protective custody ang iyang 16-anyos nga abay human nasakmitan og dako nga gidaghanon sa gipagtuohang shabu nga nagbalor og kapin ₱1.3 milyon sa usa ka border control checkpoint sa Barangay Tuboran, Mawab, Davao de Oro, niadtong Setyembre 7, 2026.

Giila ang rider sa alyas nga “Russ,” samtang ang iyang minor de edad nga kuyog pulos residente sa Bislig City, Surigao del Sur. Nahitabo ang pagparada kanila sa mga opisyal sa 2nd Provincial Mobile Force Company pasado alas 4:00 sa kaadlawon human nabatikdan nga walay side mirror ug plaka ang ilang motorsiklo, ug wala usab makapakita og driver’s license ang drayber.

Nakuha gikan sa ilang gidala ang dagkong pakete sa gipagtuohang shabu diin gi-turnover dayon ang 16-anyos sa mga awtoridad aron hatagan og saktong proteksyon, samtang ang rider gipriso ug giandaman na og pormal nga kaso.